Azərbaycan güləşçiləri Bosniya və Herseqovinanın paytaxtı Sarayevoda keçirilən yeniyetmələr arasında dünya birinciliyində medallarının hesabını bürünc mükafatla açmışlar.

Yunan-Roma üsulu ilə güləşənlərin turnirində Xancavad Məcidzadə fərqlənmişdir. Təmsilçimiz ilkin mərhələdə Hindistan və Ukrayna idmançıları üzərində qələbələrdən sonra, dörddəbir finalda rusiyalı rəqibinə uduzmuş, təsəlliverici görüşdə Serbiya nümayəndəsinə qalib gəlmiş, bürünc medal uğrunda mübarizədə isə İran güləşçisindən üstün olmuşdur. Nəticədə Xancavad 50 kq çəki dərəcəsində çıxışlarını fəxri kürsünün üçüncü pilləsində başa vurmuşdur.

“Klassiklərin” turnirində növbəti görüşlər dünən keçirilmişdir. Bu gün yeniyetmə qızlar dünya çempionatının medalları uğrunda mübarizəyə başlayacaqlar.

Oqtay BAYRAMOV,
“Xalq qəzeti”