Braziliyanın Salvador de Bahiya şəhərində keçirilmiş gənclər arasında dünya çempionatı başa çatdıqdan dərhal sonra Azərbaycan Güləş Federasiyasının mütəxəssisləri təhlillər aparmış və bu qənaətə gəlmişlər ki, gənc güləşçilər beynəlxalq meydanda ən yaxşı nəticələrini məhz 2015-ci ildə göstərmişlər.

Federasiyanın saytında verilmiş cədvəldən məlum olur ki, təmsilçilərimiz bu il Avropa və dünya çempionatlarında əvvəlki illərlə müqayisədə rekord göstəriciyə nail olmuşlar. Qitə birinciliyində (sərbəst güləş, yunan-Roma güləşi və qızlar) üst-üstə 15 medal --5 qızl, 4 gümüş, 6 bürünc, dünya çempionatında isə 14 mükafat (7+4+3) qazanılmışdır. Ümumilkdə gənc güləşçilərimiz dünya və Avropa birinciliklərindən Azərbaycana 29 medal gətirmişlər ki, onlardan da 12-si ən yüksək əyarlı mükafatdır.

Ölkəmizin gənc güləşçilərinin bu il qazandıqları medalların həm sayına, həm də keyfiyyətinə görə ötən illərdə dünya və Avropa çempionatlarında əldə olunmuş medalları üstələməsi bir daha təsdiq edir ki, Azərbaycanda zəngin ənənələrə malik güləşin inkişafı düzgün istiqamətdədir və milli komandalarımızda çıxış edən ən yaxşı ustalara layiqli ehtiyat qüvvə yetişir.

Bu səbəbdən də sentyabrın əvvələrində ABŞ-ın Las-Veqas şəhərində keçiriləcək XXXI Yay Olimpiya Oyunlarına lisenziya xarakterli dünya çempionatını böyük maraqla gözləyirik.

Oqtay BAYRAMOV,
“Xalq qəzeti”