Hələ imkan var

Azərbaycanın 19 yaşadək futbolçulardan ibarət yığma komandası Portuqaliyada keçirilən Avropa çempionatı seçmə mərhələsinin ikinci turunda Yunanıstan kollektivinə uduzsa da (0:1) vəziyyəti düzəltmək, 3-cü qrupun yekun cədvəlində ikinci yeri tutub növbəti mərhələyə vəsiqə qazanmaq imkanını özündə saxlayır.
Bu turun digər oyununda Portuqaliya futbolçuları gürcüstanlı yaşıdlarını böyük hesabla məğlubiyyətə uğratmışlar - 3:0.
Turnir bu gün Azərbaycan-Gürcüstan və Portuqaliya-Yunanıstan görüşləri ilə başa çatacaqdır. Bu oyunlar ərəfəsində turnir cədvəlində lider mövqeyində olan meydan sahiblərinin 4, Gürcüstan və Yunanıstan komandalarının hərəyə 3, Azərbaycan yığmasının 1 xalı var. Gənc futbolçularımız finişə ikinci çatmaq üçün həm özləri gürcüstanlı rəqiblərinə qalib gəlməli, həm də Portuqaliyanın Yunanıstan üzərində qələbəsinə ümid etməlidirlər. Bir sözlə, hər şey bu gün Bakı vaxtı ilə saat 20-də başlanacaq görüşlərdən sonra qəti məlum olacaq.

Noyabrın üçüncü ongünlüyünü gözləyək...
Naxçıvanın "Araz" komandası futzal üzrə UEFA kuboku yarışlarının seçmə turnirində olduğu kimi elit mərhələdə də fərqlənib "Dördlər finalı"na vəsiqə qazana biləcəkmi? Azərbaycan çempionunun pərəstişkarları bu suala noyabrın üçüncü ongünlüyündə keçiriləcək oyunlardan sonra cavab alacaqlar.
Elit mərhələdə 16 komanda dörd qrupda yarışacaq. Qrupların qalibləri "Dördlər finalı"nda UEFA kuboku uğrunda mübarizəni davam etdirəcəklər.
"Araz" bu məqsədə nail olmaq üçün noyabrda qarşılaşacağı "Viz Sinara" (Rusiya), "Ararat" (Kipr) və "Sitta Di Montesilvano" (İtaliya) klubları ilə görüşlərdə onlardan üstün oyun nümayiş etdirməlidir. Bu günlərdə UEFA-nın İsveçrənin Nyon şəhərindəki mənzil-qərargahında atılmış püşk naxçıvanlı futzal ustalarına məhz bu komandaları rəqib seçmişdir.

Liderlər səfərdə oynayacaqlar
Azərbaycan milli komandasının Avropa çempionatının seçmə yarışları çərçivəsində Avstriya və Türkiyə yığmalarına qarşı keçirdiyi oyunlarla əlaqədar ölkə çempionatında verilən iki həftəlik fasilədən sonra ən yaxşı klublarımız yenidən yaşıl meydançaya qayıdırlar. Bu gün üç oyunla doqquzuncu tura start veriləcək: "Qəbələ" - "Muğan", AZAL - "İnter" və "Bakı" - MOİK.
Azarkeşlər liderlərin iştirakı ilə keçiriləcək görüşləri isə sabah izləyəcəklər. Fasilədən daha yaxşı əhval-ruhiyyə ilə, turnir cədvəlində vahid lider mövqeyində qayıdan "Neftçi" Tovuzda "Turan"ın qonağı olacaq, onun ən yaxın izləyicisi "Xəzər-Lənkəran" isə Gəncədə eyniadlı yerli klubla qarşılaşacaq. Bu günə təyin edilmiş daha bir oyunda "Qarabağ" meydança sahibi rolunda "Simurq"u sınağa çəkəcək.

Şəhriyar Məmmədyarov və daha doqquz qrossmeyster
Rusiya Şahmat Federasiyasının saytında Moskvada başlanacaq Mixail Talın xatirə turnirinin mükafatları uğrunda on məşhur qrossmeyster mübarizə aparacaqdır.
Sayca beşinci dəfə təşkil edilən bu yarışın iştirakçıları arasında Azərbaycan şahmatının lideri Şəhriyar Məmmədyarov (2756) da olacaq. Təmsilçimiz xatirə turnirində Levon Aronyan (Ermənistan, 2783), Vladimir Kramnik (Rusiya, 2750), Pavel Elyanov (Ukrayna, 2761), Aleksandr Qrişuk (Rusiya, 2760), Boris Gelfand (İsrail, 2751), Aleksey Şirov (İspaniya, 2749), Sergey Karyakin (Ukrayna, 2747), Hikaru Nakamura (ABŞ, 2733) və Van Hao (Çin, 2742) ilə görüşəcəkdir.
Qrossmeysterlərin turniri dairəvi sistem üzrə keçiriləcək və noyabrın 14-də başa çatacaq.

Oqtay BAYRAMOV, "Xalq qəzeti"