İyulun 30-da, “Tbilisi-2015” Gənclərin 13-cü Avropa Olimpiya Festivalının növbəti yarış günü Azərbaycan cüdoçuları daha bir qızıl medala sevinmişlər. Komandamızda günün qəhrəmanı Hasil Cəfərov (73 kq ) olmuşdur.

Tatami üzərində yaxşı hazırlıq nümayiş etdirən təmsilçimiz bütün rəqiblərini, o cümlədən yarımfinalda Bosniya və Herseqovina idmançısını, finalda isə rumın Razvan Siolanunu məğlubiyyətə uğradaraq fəxri kürsünün ən yüksək pilləsində təbrikləri qəbul etmişdir.

H.Cəfərovun bu müvəffəqiyyətindən sonra Azərbaycan cüdoçularının medallarının sayı beşə çatmışdır. Xatırladaq ki, turnirin ilk iki günündə Şəfəq Həmidova (40 kq) qızıl, Kəramət Hüseynov (55 kq) gümüş, İbrahim Bayramlı (50kq) və İsmayıl İbrahimov (60 kq) bürünc mükafatlar qazanmışlar.

Azərbaycan yığması festival proqramının dünənki yarışları ərəfəsində cüdoçuların uğurları sayəsində medalçı ölkələrin siyahısında 2 qızıl, 1 gümüş və 2 bürünc mükafatla 14-cü mövqedə qərar tutmuşdur. İlk üç pillədə Rusiya (7+5+7), İtaliya (7+2+3) və Macarıstan (6+2+6) irəliləyirlər.

Oqtay BAYRAMOV,
“Xalq qəzeti”