UEFA Çempionlar Liqası turnirinin üçüncü təsnifat mərhələsinin ilk oyunları çərçivəsində Qlazqoda Şotlandiya və Azərbaycan çempionlarının gərgin mübarizə şəraitində davam edən ilk görüşündə "Seltik"in xeyrinə qeydə alınmış "sürüşkən" 1:0 hesabı meydan sahiblərinin ürəkdən sevinmələrinə ciddi əsas vermədiyi kimi, "Qarabağ"ı da heç cür ruhdan sala bilməz.

Ağdam klubu çətin səfər matçında adlı-sanlı rəqiblə mübarizədə özünü itirməmiş, "Seltik"ə layiqli müqavimət göstərmiş və yalnız bir dəfə, hakimin final işarəsinə səkkiz dəqiqə qalmış qapısının təhlükəsizlyini qoruya bilməmişdir. Lakin şotlandların müdafiəçisi Dedrik Boyatanın 82-ci dəqiqədə vurduğu və oyunun taleyini həll edən qol Azərbaycan futbolçularının cavab görüşü ərəfəsində ümidsiz vəziyyətə düşdüklərini bildirmir. Əksinə, Qurban Qurbanovun komandası Qlazqodakı məğlubiyyətin əvəzini Bakıda artıqlaması ilə çıxa bilər. Komanda çətin vəzifələri həll etməyi bacardığını artıq dəfələrlə sübuta yetirmişdir.

Bu səbəbdən də avqustun 5-də Tofiq Bəhramov adına Stadionda keçirilib möhkəm azarkeş dəstəyi ilə müşayiət olunacaq cavab görüşünü nikbin əhval-ruhiyyə ilə gözləyək və ümid edək ki, iki oyunun yekununda pley-off mərhələsinə vəsiqəyə məhz "Qarabağ" və onun çoxsaylı pərəstişkarları sevinəcəklər.

Oqtay BAYRAMOV,
"Xalq qəzeti"