“Bakı-2015"-in boks turnirinin bürünc mükafatçısı ukraynalı Viktor Petrov (69 kq) sport.ua saytına müsahibəsində Avropa Oyunlarında iştirakından böyük zövq aldığını, yaxşı təcrübə qazandığını söyləyib:

– Bakı turnirinə “Köhnə qitə”nin ən güclü boksçuları toplaşıblar. Ona görə də çıxış etmək çox çətin idi. Lakin mən bu yarışda iştirakımdan böyük zövq aldım. Çox böyük təcrübə qazandım, gələcəkdə bu təcrübənin mənə köməyi olacaq.

Daha yüksək əyarlı medal qazanmaq istərdim, amma bunu edə bilmədim. Bununla belə, düşünürəm ki, uğurla çıxış etmişəm. Axı indi məndə tarixdə ilk dəfə keçirilən Avropa Oyunlarının bürünc medalı var.

Sayt həmçinin bildirir ki, Ukrayna Olimpiya Komitəsinin prezidenti Sergey Bubka Petrovu, onun məşqçilərini, federasiyanı təbrik edib və onlara yeni uğurlar arzulayıb.

Oqtay BAYRAMOV,
“Xalq qəzeti”