Türkiyənin yunan-Roma güləşçisi  Rza Kayaalp (130 kq) I Avropa Oyunlarında qalibiyyətini xüsusi jestlə Azərbaycan xalqı ilə bölüşüb. Əlində, Azərbaycan və Türkiyə bayraqları ilə səhnəyə çıxan güləşçinin bu addımını  azarkeşlər coşqu ilə qarşılayıblar.

Türkiyənin HaberTürk saytının əməkdaşı ilə təəssüratlarını bölüşən Rza Kayaalp  azərbaycanlı tamaşaçıların türk atletlərinə azarkeşliyindən və dəstəyindən məmnun olduğunu bildirib. “ Türkiyə olaraq, inanılmaz maraqla qarşılandıq. Doğrusu, ölkəmizdə  bu cür dəstək görməmişdik. Mən də bu sevgiyə qarşılıq olaraq, oyunun sonunda Türkiyə və Azərbaycan bayraqları ilə çıxdım. Gördüyümüz diqqət və sevgi qarşısında mənim etdiyim azdır. ”

Qeyd edək ki, Türkiyə güləşçisi  finalda Azərbaycan təmsilçisi Sabah Şəriəti ilə qarşılaşmada  3:1 hesabı ilə qələbə qazanmışdı.

Əfsanə BAYRAMQIZI,
“Xalq qəzeti”