İyunun 18-də Milli Gimnastika Arenasında idman gimnastikası üzrə fərdi çoxnövçülük yarışlarının qalibləri müəyyənləşib. AZƏRTAC xəbər verir ki, Azərbaycan gimnastı Oleq Stepko 89,065 xal toplayaraq gümüş medala layiq görülüb. Qızıl medalı ukraynalı Oleq Vernyayev qazanıb (90,332), Rusiya təmsilçisi Nikita İqnatyev (87,365) bürünc medalla kifayətlənib.

Qadınlar arasında idman gimnastikasının fərdi çoxnövçülük yarışlarının nəticələrinə görə, rusiyalı Aliya Mustafina (58,566) qızıl medala sahib olub. İsveçrəli Giyuliya Steingruber (56,699) gümüş, niderlandlı Liyeke Şevers (55,065) bürünc medal qazanıblar.

Qaliblərin mükafatlandırılması mərasimində kişi idmançılara medalları Azərbaycanın birinci xanımı, Gimnastika Federasiyasının prezidenti, birinci Avropa Oyunları Təşkilat Komitəsinin sədri Mehriban Əliyeva təqdim edib.