Oktyabrın 9-da Bakı İdman Sarayında qadınlar arasında cüdo üzrə dünya kuboku yarışlarının təntənəli açılış mərasimi keçirilmişdir.
İştirakçı komandaların paradından sonra gənclər və idman nazirinin müavini İsmayıl İsmaylov, Avropa Cüdo Federasiyasının rəsmisi Laszlo Tot, Azərbaycan Cüdo Federasiyasının prezidenti Füzuli Ələkbərov idmançılara uğurlar arzulamışlar.
İsmayıl İsmayılov bildirmişdir ki, Azərbaycan xalqının ümummilli lideri Heydər Əliyev daim bədən tərbiyəsi və idmanın inkişafını dəstəkləmişdir. Bu gün həmin ənənə davam etdirilir və idmançılarımız son illər ərzində bir çox beynəlxalq yarışlarda ölkəmizi layiqincə təmsil etmişlər. Bütün bunlar dövlətimizin başçısı, Azərbaycan Milli Olimpiya Komitəsinin prezidenti İlham Əliyevin idmanın inkişafına göstərdiyi qayğının nəticəsində mümkün olmuşdur.
Avropa Cüdo Federasiyasının rəsmisi Laszlo Tot yarışın yüksək səviyyədə təşkili üçün Azərbaycan rəhbərliyinə təşəkkürünü bildirmiş və iştirakçılara uğurlar arzulamışdır. Azərbaycanda güclü idmançıların olduğunu söyləyən L.Tot respublikamızın qüdrətli idman ölkəsinə çevrildiyini diqqətə çatdırmışdır. Azərbaycanda mötəbər yarışların keçirilməsi üçün gözəl şəraitin olduğunu bildirən qonaq tikilən yeni idman mərkəzlərinin və komplekslərinin idmanın inkişafının göstəricisi olduğunu söyləmişdir.
Azərbaycan Cüdo Federasiyasının prezidenti Füzuli Ələkbərov yarışı açıq elan etmiş, Azərbaycanın dövlət himni səslənmişdir.
Açılış mərasimi konsert proqramı ilə davam etmişdir.
İncəsənət ustalarının konsertindən sonra müxtəlif çəki dərəcələrində yarımfinal və final görüşləri keçirilmişdir.
AzərTAc