Birinci Avropa Oyunları münasibətilə Azarkeşlər evinin təntənəli açılışında Rusiyanın idman naziri Vitali Mutko da iştirak edib.

V. Mutko jurnalistlərə müsahibəsində Azərbaycanda birinci Avropa Oyunlarına hazırlığın yüksək səviyyədə olduğunu bildirərək deyib: “Oyunların təşkili çox yüksək səviyyədədir. Olimpiya Oyunları standartı əsas götürülüb və bu da göz qabağındadır”.

Rusiyalı nazir Bakıda birinci Avropa Oyunları üçün inşa edilən çoxfunksiyalı idman obyektlərinin  yüksək səviyyədə olduğunu vurğulayaraq  qeyd edib ki, bu, gənclərin idmanla daha fəal məşğul olmalarına təkan verməlidir.

V. Mutko bir-birinin müsbət təcrübəsindən istifadə etməyə çağıraraq deyib: “Əlbəttə, biz  Avropa Oyunlarında istifadə olunan bütün maraqlı və mühüm məqamları nəzərə alıb, sonra özümüzdə tətbiq etməyə çalışacağıq. Dostlardan həmişə öyrənmək lazımdır”.

Ekspozisiyanın hazırlanmasında Rusiyanın Dövlət İdman Muzeyi və idman federasiyaları iştirak ediblər. Azarkeşlər evinin hər bir qonağına Avropa Oyunlarına həsr olunmuş interaktiv viktorinada iştirak etmək və xatirə suvenirləri udmaq təklif olunur.

Rusiyalı politoloq, RF İctimai Palatasının üzvü Sergey Markov da Azarkeşlər evinin açılış mərasimində jurnalistlərlə söhbət edib. O, qeyri-adi bir ideya səsləndirərək, Bakını Avropa Oyunlarını keçirmək üçün daimi məkana çevirməyi təklif edib.

S.Markov deyib: “Bu Oyunları təkcə idman deyil, mədəni-idman yarışlarına çevirmək,  burada müğənnilərin, rəqqasların, filosofların iştirakını təmin etmək daha yaxşı olardı. Axı, Yunanıstanda ilk Olimpiya Oyunları əslində məhz bu şəkildə keçirilib”.

S.Markov zarafatla əlavə edib ki, rusiyalı idmançılara və azərbaycanlı təşkilatçılara azarkeşlik edəcək.

AZƏRTAC