İyunun 12-də Bakı Su İdmanı Sarayında keçirilən sinxron üzgüçülük yarışı ilə “Bakı-2015" birinci Avropa Oyunlarına start verilib.

Yarışın ilk günündə Azərbaycan, Belarus, Slovakiya, Polşa, Macarıstan, İspaniya, Çexiya, Rusiya, Türkiyə, Ukrayna, Avstriya, Lixtenşteyn, Yunanıstan, İsveçrə, Fransa, Bolqarıstan, İsrail, Hollandiya, İtaliya təmsilçiləri çıxış ediblər. Sinxron üzgüçülük yarışının təsnifat mərhələsində 20 duet və 14 milli komanda mübarizə aparıb.

Duetlərin mübarizəsində Azərbaycanı Tatyana Nikitina və Yekaterina Valiulina təmsil ediblər. On beş yaşlı T.Nikitina 2012-ci ildən yarışlarda çıxış etməyə başlayıb. Digər üzgüçümüz - 16 yaşlı Y.Valiulina də komanda yoldaşı T.Nikitina kimi, 2012-ci ildən turnirlərdə mübarizəyə qoşulub. Üzgüçülərimiz “Bakı-2015" birinci Avropa Oyunlarının ilkin mərhələsində çıxış etməklə Azərbaycan idmançıları arasında yarışlara başlayan ilk atletlər olublar. Azərbaycanlı duet 10-cu nömrə altında çıxış edib. Təmsilçilərimizin ilkin mərhələdə çıxışının nəticələri münsiflər heyəti tərəfindən 71.4333 balla qiymətləndirilib. Bu nəticə ilə təmsilçilərimiz 20 iştirakçı arasında 18-ci pillədə qərarlaşıblar.

İlk üçlükdə müvafiq olaraq, Rusiya, Ukrayna və İspaniyadan olan cütlüklər qərarlaşıb. Rusiya təmsilçiləri Valeriya Filenkova-Darya Kulagina 89.2333, ukraynalı idmançılar Yana Nariejna və Yelizaveta Yaxno 87.5333, ispaniyalı atletlər Yulia Echeberria Esquivel və İrene Toledano Karmelo 85.7333 bal toplayıblar.

Komandaların mübarizəsində də qaliblərin sırası dəyişməyib. Rusiya komandası 89.9333 xalla yarışın ilk gününü lider olaraq başa vurub. Ukrayna millisi 87.3000 balla ikinci, İspaniya yığması isə 86.1333 balla üçüncü sırada başa vurub.

Hər iki növ üzrə yarışın final mərhələsi iyunun 15-də təşkil olunacaq. Yarışlarda 150 idmançı dörd dəst medal uğrunda mübarizə aparır.

AZƏRTAC