Çexiyalı cüdoçu, dünya və Avropa çempionu Lukaş Krpalek “İDNES.cz” internet saytına müsahibəsində Bakıda daha möhtəşəm qələbə qazanmaq niyyətində olduğunu açıqlayıb. Mənbə qeyd edir ki, L.Krpalek birinci Avropa Oyunlarında medal qazanmaq və tarixə yazılacaq bu Oyunlarda da olimpdə olmağı qarşısına məqsəd qoyub.

Birinci Avropa Oyunlarında 100 kiloqram çəki dərəcəsində mübarizə aparacaq çexiyalı cüdoçu, ikiqat Avropa çempionu olmasına baxmayaraq,  “Bakı - 2015"- də bu titulu üçüncü dəfə əldə etməyi düşünür. Lakin bütün hazırlıqlara baxmayaraq, Lukaş Azərbaycanda yarışların gərgin rəqabət şəraitində keçəcəyini deyir.

Birinci Avropa Oyunları ilə bağlı fikirlərini jurnalistlərlə bölüşən  çexiyalı cüdoçu deyib: “Avropa Oyunları ilin ən önəmli tədbirlərindən biridir. Bu, həqiqətən çox çətin bir yarış olacaq. Mənim üçün daha çətin olacaq. Çünki ötən il əldə etdiyim qızıl mükafatı qoruyub saxlamaq istəyirəm. Mükafat qazanacağıma ümid edirəm. Hər hansı bir mükafat, xüsusilə də qızıl medal əldə etməyim çox yaxşı olardı”.

İlk Avropa Oyunları öncəsi nikbin ruhda olan idmançı deyib: “Ümid edirəm ki, Bakıdakı qələbəm daha möhtəşəm olacaq”.

Elçin ABBASOV,
“Xalq qəzeti”