“I Avropa Oyunlarının ab-havası paytaxtımızın misilsiz gözəlliyinə məxsusi əsrarəngizlik gətirib.

Artıq oyunların iştirakçıları və qonaqlar şəhərimizə gəlməyə başlayıblar. Avropa böyük maraqla oyunların start götürəcəyi anı gözləyir. Oyunların keçiriləcəyi günlər Bakı Avropa idmanı üçün əsl mərkəzə çevriləcək”. Bunu qəzetimizə açıqlamasında Olimpiya çempionumuz Şərif Şərifov dedi.

London Olimpiadasında xalqımıza qızıl medal sevinci yaşadan və bu böyük nailiyyəti ilə Azərbaycanın güləş tarixinə dəyərli töhfə verən tanınmış pəhləvanımız ilk Avropa Oyunlarında  idmançılarımızın tarix yazacaqlarına əminliyini bildirdi: “Son illər beynəlxalq arenalarda keçirilən mötəbər yarışlarda idmançılarımızın əldə etdikləri böyük nailiyyətlər Azərbaycanı idman ölkəsi kimi tanıdıb. Tarixi oyunlarda yüksək səviyyədə çıxış etmək üçün atletlərimizin geniş imkanları var. Əminəm ki, Azərbaycan komandası öz layiqli qələbələri ilə ilk Avropa Oyunlarında tarix yazacaq”.

Söhbəti qələmə aldı:
Leyla QURBANOVA,
“Xalq qəzeti”