Birinci Avropa Oyunlarında kişilərdən ibarət su polosu komandalarının turnirində çempionluğa əsas nazmizədlərdən biri, şübhəsiz, idmanın bu növündə yaxşı ənənələrə malik Rusiya yığması olacaq. Bu ölkənin vaterpol ustaları dəfələrlə beynəlxalq yarışların qalibi və mükafatçıları sırasında yer tutmuşlar.

Komanda indi Bakıya da mübariz əhval-ruhiyyə ilə gəlir. Onun baş məşqçisi Aleksandr Yerışov Rusiya Olimpiya Komitəsinin saytına müsahibəsində bu barədə belə deyib:

– Biz Avropa Oyunlarına birinci yeri tutmaq üçün gedirik. Komanda çox mübariz əhvaldadır. Qarşımıza ən ciddi vəzifə qoymuşuq. Bu yarışların statusu çox yüksəkdir. Hesab edirəm ki, Avropa Oyunları öz əhəmiyyətinə görə Olimpiya oyunlarına çox yaxın olacaq. Oyunların proqramına, əslində, bütün yay idman növləri daxildir. Ona görə də biz Avropa qitəsi ölkələrinin yenicə sahib olduqları beynəlxalq idman hadisəsinin əhəmiyyətini bir aydan sonra daha yaxşı başa düşəcəyik.

Oqtay BAYRAMOV,
“Xalq qəzeti”