Rusiyanın sərbəst güləş üzrə milli komandasının baş məşqçisi, Olimpiya çempionu Hacımurad Məhəmmədov “Bakı-2015" birinci Avropa Oyunlarına hazırlıq və planları ilə əlaqədar R-Sport agentliyinə müsahibə verib. Məşqçi deyib:

“Komanda Bakıda Avropa Oyunları ərəfəsində son təlim-məşq toplanışını Novoqorskda keçirir. Bütün idmançılar səylə hazırlaşırlar, heyətdə heç bir dəyişiklik yoxdur. Əvvələr qərara aldığımız kimi, Bakı turnirində mayda Kaspiyskdə keçirilmiş Rusiya çempionatının bütün qalibləri iştirak edəcəklər. Əgər biz 3-4 qızıl medal qazansaq, bunu yaxşı nəticə hesab etmək olar.

Bizim əsas rəqibimiz Azərbaycan güləşçiləri olacaq. Əminəm ki, onlar öz xalçaları üzərində maksimum nəticə göstərməyə çalışacaqlar. Ayrı-ayrı çəki dərəcələrində isə, ilk növbədə, Türkiyə və Ermənistan idmançıları çox təhlükəlidirlər".

Əlavə edək ki, sərbəst üsulla güləşənlərin turniri iyunun 17-18-də Heydər Əliyev  adına İdman Sarayında keçiriləcək və hər gün dörd çəki dərəcəsində Avropa Oyunlarının çempion və mükafatçıları müəyyənləşəcək.

Oqtay BAYRAMOV,
“Xalq qəzeti”