İlk Avropa Oyunlarında Türkiyədən təxminən 200 idmançı iştirak edəcək. Trend-in məlumatına görə, bu sözləri jurnalistlərə Türkiyənin Azərbaycandakı səfiri İsmayıl Alper Coşqun Beynəlxalq Hava Limanında Türkiyədən gələn idmançıların qarşılanma mərasimində bildirib.

Səfirin sözlərinə görə, bu gün türkiyəli idmançılardan ibarət ilk qrup Bakıya gəlib və onlar özlərini öz ölkələrindəki kimi hiss edirlər.

Səfir onu da bildirib ki, Avropa Oyunlarının təşkili üçün Bakıya təşəkkür edir: “Azərbaycanda Avropa Oyunlarına uzun zamandır ciddi hazırlıq aparılır. Ümid edirəm ki, “Bakı–2015” Avropa Oyunları Azərbaycanın və Türkiyənin qürur duyduğu bir tədbir olacaq”.

Türkiyəli diplomatın sözlərinə görə, Azərbaycan bir daha dünyaya sübüt edəcək ki, o belə möhtəşəm tədbirlər keçirməyə qadirdir.

Bakıya gələn Türkiyə nümayəndə heyətinin rəhbərinin müavini Özal Çətin jurnalistlərə deyib ki, Azərbaycan Avropa Oyunlarını yüksək səviyyədə təşkil edəcək.

O qeyd edib ki, türkiyəli idmançılar Azərbaycanda özlərini Vətənlərindəki kimi hiss edirlər.