Dünya çempionları Bakıda idman şousu göstərəcəklər.

BEGOC-dan “Trend”ə verilən məlumata görə, atletika üzrə dünyanın bir sıra qabaqcıl idmançısı birinci Avropa Oyunları zamanı, yarışların ikinci həftəsində, Bakı şəhərinin küçələrində öz bacarıqlarını idman həvəskarlarına nümayiş etdirəcəklər.

Dünya çempionları R.Holzdeppe və B.Bondarenko “Bakı 2015”-in təşkilatçılığı ilə şəhərin Fəvvarələr meydanında keçiriləcək idman nümayişində iştirak edəcək 24 idmançı arasında olacaqlar.

Qeyd edək ki, şüvüllə tullanma üzrə alman idmançı Holzdeppe və hündürlüyə tullanma üzrə ukraynalı idmançı Bondarenko 2013-cü ildə Moskvada keçirilmiş dünya empionatında qızıl medala sahib olublar.

Şüvüllə tullanma üzrə keçiriləcək nümayişdə qadınlardan “London 2012”-nin finalçıları Silke Şpiqelburq və Liza Rizih də iştirak edəcəklər.

Kişilərin və qadınların şüvüllə tullanma yarışı iyunun 24-də saat 17:30-dan 20:30-dək, kişilərin hündürlüyə tullanma yarışı isə iyunun 25-də eyni saatlarda keçiriləcək.