Bu sözləri Bakının Səbail rayonu ilə dostluq əlaqəsi saxlayan ABŞ- ın Nyu- York şəhəri Bruklin rayonundan bugünlərdə Azərbaycan paytaxtına qonaq gəlmiş nümayəndə heyətinin üzvü Alyona Bədəlova söylədi. Alyona ABŞ-dakı Azərbaycan diaspounun fəallarından biri olaraq, ölkəmizlə bağlı həqiqətlərin okeanın o tayında xoşməramlı insanlara çatdırılmasına, burada dostlarımızın çoxalmasına çalışır.

Gənclik illərində Bakıda uşaq yaradıcılıq mərkəzində metodist və orta məktəbdə təşkilatçı işləmiş həmyerlimiz Nyu- Yorkda da bilik və bacarığını yeni nəsillə işə həsr edərək, “Mənim yolum” adlı uşaq yaradıcılıq mərkəzi yaratmış, burada Azərbaycan icması uşaqlarının mahnı və rəqs qrupunu formalaşdırmışdır. Alyona Bədəlova ilə Səbail Rayon İcra Hakimiyyətində görüşümüz zamanı o, Bakıda keçiriləcək birinci Avropa Oyunları ilə bağlı təəssüratını ayrıca ifadə etdi:

– ABŞ- da Azərbaycan diasporu gücləndikcə ölkəmizi tanıtmaq imkanlarımız da artır, dostlarımızın  sayı isə çoxalır. Son illərdə Bakıda keçirilən müxtəlif beynəlxalq tədbirlərin geniş əks- sədası “Yeni qitə”də daha güclü eşidilir. Bu işdə media şəbəkəsinin yaydığı informasiyaları bizim apardığımız izahat- təbliğat işləri  bir az da genişləndirir, əlavə məzmunla dolğunlaşdırır.

Bakıda ilk Avropa Oyunları yarışmasının keçiriləcəyi barədə xəbərlər yayılan gündən diasporumuz bu yarışmaya hazırlığın dünyanın hər yerində Azərbaycanın layiqincə tanıdılması ilə müşayiət olunması işinə fəal qoşulub. Azərbaycanın ABŞ-dakı çoxsaylı dostları Bakıda keçiriləcək ilk Avropa Oyunlarını qitə  idmanının tarixində yeni dövrün başlanğıcı olaraq tanıdırlar.

Biz apardığımız işlərdə ona istinad etmişik ki, Avropada ilk dəfə keçirilən böyük yarışmanın Azərbaycan paytaxtına etibar olunması bu ölkənin sürətli inkişafına, qısa müddətdə qazandığı imkanlara, dünyaya sərgilədiyi xoş mərama inamdan qaynaqlanır. Ötən iki ildə keçirdiyimiz əksər tədbirlərdə Avropa oyunlarına hazırlıqla bağlı daim dostlarımızı məlumatlandırmışıq. May ayında Nyu- Yorkda keçirilən türk festivalı çərçivəsində isə “Bakı- 2015”in təqdimatını  ayrıca yürüş şəklində həyata keçirtdik.

Son bir ildə yaradılmış Bruklin–Səbail dostluq qrupu da bu istiqamətdə fəaliyyətimizə dəstək verir. Bu günlərdə səbaillilərin qonağı olmuş bruklinlilər yarışların əsas mərkəzlərindən olan Səbail rayonunda aparılan hazırlıq işləri ilə yaxından tanış oldular. Qısa müddətdə görülmüş əzəmətli işlər hamımızı heyran qoydu. Ötənilki səfərimizdən sonra baş veən dəyişikliklər isə heyrətimizə səbəb oldu.

Bir daha inandıq ki, Bakı bu məsul, mötəbər yarışma üçün nə lazımdırsa hamısını edib. Hazırlıq işlərinə ölkə Prezidentinin və birinci xanımın rəhbərlik etməsi hər işin ən yüksək səviyyədə görülməsini təmin edib.

Azərbaycanla dosrluğa böyük önəm verən bruklinlilər bütün bu gördüklərinə ürəkdən sevindilər. Səbailli dostlarımız Bruklinin rəhbəri Erik Adams başda olmaqla böyük bir heyəti yarışları yerindəcə izləmək üçün Bakıya dəvət ediblər. Bu işə hazırlıq da yüksək səviyyədə aparılıb. Ümumiyyətlə, ABŞ-dan gələcək çoxsaylı turistlərin yerləşməsi, yarışları izləməsi, mədəni-kütləvi tədbirlərdə iştirakı, Azərbaycanı daha yaxşı tanıması üçün nə lazımdırsa nəzərdə tutulub.

İnanırıq ki, yaxın günlərdə Bakıdan start götürəcək ilk Avropa Oyunları finişə böyük uğurla çatacaq. Bu yarış Avropa və dünya idmanının tarixində yeni səhifə olduğu kimi, Azərbaycanın dünyaya tanıdılmasında da yeni bir yüksəkliyin fəth edilməsi ilə əlamətdarlıq qazanacaq.

Hazırladı: R. TAHİR,
“Xalq qəzeti”