Türkiyə Güləş Federasiyasının birinci Avropa Oyunlarına göndərəcəyi 15 nəfərlik qadın güləşçidən ibarət qrup Ertuğrul Aydoğdunun başçılığı ilə təlim-məşq düşərgəsində olarkən,  “Milliyet” qəzetinin müxbirinə “Bakı - 2015”-lə bağlı müsahibə verib. Ertuğrul Aydoğdu güləşçilərinin “Bakı - 2015”- də dörd medal qazanacağına ümid etdiyini bildirərək deyib: Bu istiqamətdə fəaliyyətimizi davam etdiririk.

Ümid edirəm ki, biz öz niyyətlərimizi doğruldacağıq. Lazım olan hər bir işi görəcəyik və öz idmançılarımızın arxasında duracağıq.

Qeyd edək ki, komanda üzvlərindən biri də, 2013-cü il Aralıq dənizi ölkələri Oyunlarında qızıl medal qazanmış xanım Hafize Şahindir. 2014-cü il Avropa Çempionatının gümüş medalçısı olan  Hafize Şahin isə “Milliyyet” qəzetinə müsahibəsində Bakıda medallar qazanmaq həvəsində olduqlarını söyləyib: “Türkiyəni ən yaxşı şəkildə təmsil etmək məqsədilə ilk Avropa Oyunlarına gedəcəyik və biz milli himnimizi səsləndirmək üçün əlimizdən gələni əsirgəməyəcəyik. Bilirik ki, güləş döşəyi üzərində mübarizə apararkən 75 milyonluq xalq bizim arxamızdadır və qələbə qazanmağımız üçün dua edir”.

Elçin ABBASOV,
“Xalq qəzeti”