Beynəlxalq Olimpiya Komitəsinin sabiq prezidenti Jak Roqqe I Avropa Oyunlarının dünya gənclərini ruhlandıracağına əminliyini ifadə edib. O, bu möhtəşəm tədbirin əsl bayram əhval-ruhiyyəsində keçəcəyini vurğulayıb: “Azərbaycanın ev sahibliyi edəcəyi bu mötəbər tədbir çox qısa vaxtdan sonra, iyun ayında başlayacaq və biz böyük idman bayramının şahidi olacağıq”.

J.Roqq “Bakı-2015” birinci Avropa Oyunlarının uzun müddət yaddaşlarda qalacağını bildirib. Onun fikrincə, bu yarışlar ilk dəfə keçirildiyindən böyük maraq yaradıb. Hər bir idmançı ilk Avropa Oyunlarının mükafatçısı olmaq əzmindədir. Dünyanın tanınmış idmançılarının yarışlarda iştirak edəcəyi də mübarizənin gərgin olacağından xəbər verir.

Sabiq prezident bu önəmli idman tədbirinin ölkələr arasında əlaqələrin genişlənməsi baxımından da əhəmiyyətli olduğunu vurğulayıb.

Hazırladı: Əliqismət BƏDƏLOV,
“Xalq qəzeti”