Rusiya Olimpiya Komitəsinin mətbuat xidmətinin əməkdaşları bu ölkənin Avropa Oyunlarına hazırlaşan kişi və qadınlardan ibarət çimərlik voleybolu komandalarının üzvlərindən müsahibələr almışlar. Həmin müsahibələrin ikisindən bəzi məqamlara diqqət yetirək.

Sergey Prokopyev: – Bakıda keçiriləcək Oyunlar bizim üçün müxtəlif səbəblər üzündən çox əlamətdar hadisədir. Əvvəla, bu yarışlar ilk dəfə təşkil olunur və bir növ Olimpiya oyunlarının analoqudur. İkincisi isə, mən iki Universiadada və Londonda Olimpiya Oyunlarında çıxış etmişəm. Ona görə də qarşıdakı startların necə yarış olduğunu bilirəm. Bakıda Avropa Oyunları bizim cütlük üçün cari mövsümün prioritet turniridir.

Yuliya Abalakina: —Açıq deyim, mən hələ tam başa düşə bilməmişəm ki, hara gedirəm. Ona görə ki, Avropa Oyunları mənim həyatımda qlobal idman hadisəsidir. Mühüm start ərəfəsində müəyyən dərəcədə həyəcan keçirirəm. Amma əminəm ki, biz həyəcanı aradan qaldıracaq və layiqli nəticə göstərəcəyik. Medal uğrunda mübarizə aparmağa ümid edirik...

Qeyd edək ki, Azərbaycan paytaxtında çimərlik voleybolu yarışları iyunun 16-21-də keçiriləcəkdir.

Oqtay BAYRAMOV,
“Xalq qəzeti”