Avropa Oyunlarında Serbiya nümayəndə heyətinin bayraqdarı taekvondoçu Milika Mandiç olacaq. Bu idmançı London Olimpiya Oyunları – 2012–də qadınların turnirində 67 kq çəki dərəcəsində bütün rəqiblərinə qalib gələrək qızıl medal qazanmış və indi Serbiya Milli Olimpiya Komitəsi tərəfindən yığma komandanın bayraqdarı olmaq şərəfinə layiq görülmüşdür.

M.Mandiç “Bakı–2015”–in saytına bunları bildirmişdir: – Bakıda Avropa Oyunları Olimpiya oyunları səviyyəsində yarış olacaq. Olimpiadada iştirak edə bilməyən idmançılar burada Olimpiya ruhunu hiss edəcəklər. Bizi on yeddi gün davam edəcək gözəl bir yarış gözləyir. Azərbaycanda Serbiyanı ölkənin ən yaxşı və tam hazırlıqlı idmançıları təmsil edəcəklər. Bu, birinci Avropa Oyunlarıdır və mən inanıram ki, Serbiyanın şərəfini layiqincə qoruyacağıq.