12-28 iyun tarixlərində paytaxt Bakıda təşkil olunacaq birinci Avropa Oyunlarında Türkiyəni 9 kişi və 4 qadın boksçu təmsil edəcək. Bu barədə “SonDakika.com.tr” internet saytı məlumat yayıb.

Bildirilir ki, ilk Avropa Oyunlarından yüksək nəticələrlə Vətənə dönmək istəyən  Türkiyə idmançıları yarışlara ciddi şəkildə hazırlaşırlar. Və boksçuların məqsədləri Bakıdan çoxlu sayda medallarla geri dönməkdir. Bunu qardaş ölkənin Boks Federasiyasının rəhbəri Eyüp Gözgeçin kütləvi informasiya vasitələrinə verdiyi açıqlama da təsdiq edir.

Eyüp Gözgeç jurnalistlərə müsahibəsində deyib: “ Bu il Azərbaycanda ilk dəfə  birinci Avropa Oyunlarının təşkil olunmasından qürur duyur və məmnunluq hissi keçiririk. Qardaş ölkədə təşkil olunacaq yarışlarda ölkəmizi layiqincə təmsil etmək və çoxlu sayda medallarla geri dönmək istəyirik”.

Qeyd edək ki, o, Türkiyə idmançılarının yüksək nəticələr əldə edəcəyinə güvəndiyini bildirib. Eyüp Gözgeç azərbaycanlı idmansevərlərin Türkiyə boksçularını dəstəkləyəcəyini deyib.

Elçin ABBASOV,
“Xalq qəzeti”