“Bakının ev sahibliyi edəcəyi mötəbər tədbirdə yüksək səviyyəli idman mübarizəsi ümdə vəzifəmizdir”. Bu sözləri qəzetimizə yunan-Roma güləşi üzrə dünya kubokunun qalibi, dəfələrlə dünya, Avropa çempionatlarının gümüş, bürünc medallarını qazanan Elvin Mürsəliyev dedi.

Öz çəki dərərcəsində lider sayılan idmançı Avropa Oyunlarında imkanlarından maksimum istifadə etmək üçün bütün qüvvəsini səfərbər edəcəyini bildirdi: “Dünyanın ən qabaqcıl idman ölkələrindən biri olan Azərbaycana ilk Avropa Oyunlarını keçirmək etibar edilib. Belə bir mötəbər tədbirə ev sahibliyi edəcək bir ölkənin təmsilçisi olmaq nə qədər şərəflidirsə, bir o qədər də məsuliyyətlidir. Bu vəzifənin ağırlığını çiyinlərimizdə hiss edirik. Bu il yunan-Roma güləşçilərimiz dünya kubokunu qazanmaqla tarixi qələbəyə imza atdılar. Artıq Avropa Oyunları ərəfəsindəyik. İdmançılarımız ilk Avropa Oyunlarında tarix yazmaq şansından bəhrələnmək üçün məşqlərini davam etdirirlər. Bu mötəbər yarışlarda yüksək nəticələr əldə etmək üçün var qüvvəmlə çalışacağam”.

Qələmə aldı:
Leyla QURBANOVA,
“Xalq qəzeti”