“Doğma Bakının Avropa Oyunlarının vətəni seçilməsi Azərbaycan ictimaiyyətini qürurlandırdı. Bu xəbərə avropalılar bizdən az sevinmədilər.

 Dünyanın məhz ən sürətlə inkişaf edən ölkələrindən birinin bu mötəbər tədbirə ev sahibliyi etməsi öz oyunlarını ilk dəfə keçirəcək qitə üçün çox gözəl bir xəbər idi. Nəticə göz qabağındadır. Avropa Oyunlarına yüksək səviyyədə hazırlıq bu yarışların yay Olimpiya oyunları səviyyəsində keçiriləcəyinə zəmanət verir. Son illər bir-birinin ardınca ölkəmizdə reallaşan irimiqyaslı tədbirlərin yüksək təşkilatçılıq səviyyəsini qeyd edən beynəlxalq qurumların rəsmiləri Azərbaycanın bu sahədə zəngin təcrübə topladığını dönə-dönə etiraf ediblər,- bunu Olimpiya çempionumuz Lyudmila Şubina Avropa Oyunları ilə bağlı söhbəti zamanı dedi.

Tanınmış həndbolçu Bakının Avropa Oyunlarının şöhrətini daha da artıracağını qeyd etdi: “İlk Avropa Oyunlarının standartları müəyyənləşdirilib. Bakıdan sonra oyunlara ev sahibliyi edəcək şəhərin üzərinə böyük məsuliyyət düşür. Diqqət etsək görərik ki, ölkəmizə gələcək nümayəndə heyətlərinin tərkibində çox güclü idmançılar var. Bu, ilk qitə oyunlarına verilən yüksək qiymətin təzahürüdür. Avropanın ən gözəl şəhərlərindən biri olan Bakı Avropa Oyunlarının tarixinə əbədi yazılacaq”.

Söhbəti yazdı:
Leyla QURBANOVA,
“Xalq qəzeti”