Bu günlərdə Minskdə bədii gimnastika üzrə Avropa çempionatında birdən-birə dörd qızıl medal qazanmış (birini rəfiqələri Marqarita Mamun və Aleksandra Soldatova ilə komanda çoxnövçülüyündə, üçünü isə gürzlər, lent və topla ayrı-ayrı təmrinlərdə) rusiyalı Yana Kudryavtseva yarış başa çatdıqdan sonra öz ölkəsinin R-sport agentliyinə müsahibəsində deyib ki, “Bakı-2015"də də layiqincə çıxış etməyə çalışacağam.

Artıq səkkiz dəfə Avropa çempionu olmuş 17 yaşlı Yana müsahibəsində həmçinin aşağıdakıları bildirib:—Avropa Oyunları çox mühüm yarışdır. Axı bu Oyunlar birincidir. Əgər Avropa Oyunlarında çıxış etsən, tarixdə qala bilərsən. Mən ümidvaram ki, Bakıya gedəcək və orada uğurla çıxış edəcəyəm.

Oqtay BAYRAMOV,
“Xalq qəzeti”