Şəmkirdə görkəmli azərbaycanlı qrossmeyster Vüqar Həşimovun xatirəsinə həsr edilən ikinci beynəlxalq şahmat turnirinin baş mükafatı norveçli Maqnus Karlsenə təqdim olunmuşdur. Sonuncu, doqquzuncu turda Rauf Məmmədova qalib gələn dünya çempionu finişə 7 xalla çatmış və ötənilki müvəffəqiyyətini təkrar edib xatirə turnirlərinin ikiqat qalibi olmuşdur.

İkinci mövqedə qərar tutan keçmiş dünya çempionu Vişvanatan Anand (Hindistan) Karlsendən bir xal geri qalmışdır. Üçüncü-dördüncü yerləri hərəyə 5 xalla ABŞ təmsilçisi Uesli Co və italiyalı Fabiano Karuana tutmuşlar.

Son turda ingilis Maykl Adams ilə heç-heçə oynayan Şəhriyar Məmmədyarov keçmiş dünya çempionu Vladimir Kramnik (Rusiya) kimi turniri 4 xalla başa vurmuşdur. Bu qrossmeysterlər finişə beş-altıncı pillələrdə çatmışlar. Məmmədov, Adams, hollandiyalı Aniş Giri və fransız Maksim Vaşye - Laqrav 3,5 xalla kifayətlənmişlər.

Oqtay BAYRAMOV,
“Xalq qəzeti”