Bakıda birinci Avropa Oyunları proqramına daxil olan çimərlik futbolu turnirinin püşkatma mərasimi keçirilmiş və yarışda iştirak edəcək səkkiz komanda iki qrupa bölünmüşdür.

Azərbaycan yığması Portuqaliya, İsveçrə və Ukrayna kollektivləri ilə birlikdə “A” qrupunda mübarizə aparacaq. “B” qrupuna isə Rusiya, İspaniya, İtaliya və Macarıstan komandaları daxildir.

Qrup mərhələsinin oyunları və pley-off görüşləri iyunun 24-28-də keçiriləcəkdir.

Beləliklə, püşk atılmış və ilkin mərhələdə Azərbaycanın çimərlik futbolu ustalarının rəqibləri müəyyənləşmişdir. İndi qalır çətin oyunları tam hazırlıqla qarşılamaq və tarixdə ilk dəfə keçiriləcək Avropa Oyunlarında ölkəmizi layiqincə təmsil etmək.

Xatırladaq ki, paytaxtımızda qitə idmançılarının ali məclisinin təntənəli açılış mərasimi iyunun 12-də olacaq.

Oqtay BAYRAMOV,
“Xalq qəzeti”