UEFA Çempionlar Liqası turnirinin dörddəbir final mərhələsinə ilk vəsiqələri “Real” və “Portu” komandaları qazanmışlar.

İspaniya təmsilçisi səkkizdəbir finalın cavab görüşündə Madriddə “Şalke”yə (Almaniya) 3:4 hesabı ilə məğlub olsa da, qitə klub futbolunun ən nüfuzlu turnirində yoluna davam edəcək. “Real”a bu hüququ onun Almaniyada ilk oyunda iki cavabsız qolla qələbəsi (2:0) təmin etmişdir.

Madridlilərdən fərqli olaraq, “Portu” həmin axşam daha inamlı oyun nümayiş etdirmiş və İsveçrənin “Bazel” klubuna heç bir ümid yeri qoymamışdır. Səkkizdəbir finalın birinci raundunda səfər görüşündən heç-heçə ilə ayrılan (1:1) Portuqaliya futbolçuları evdə öz pərəstişkarlarını əsl hücum futbolu və məhsuldar oyunla sevindirmişlər- 4:0.

Oqtay BAYRAMOV,
“Xalq qəzeti”