Topaz Premyer Liqasında növbəti, 20-ci tur qış fasiləsindən sonra ilk oyununu keçirən “Qarabağ”ın böyük hesabla qələbəsi və ardıcıl ikinci görüşdən 3 xalla ayrılan AZAL-ın üçüncü dövrədə inamlı startı ilə daha çox yadda qalacaq.

Ağdam klubu turnir cədvəlinin sonuncu pilləsində olan və qibtəedilməz vəziyyətini düzəldəcəyinə, deyəsən, elə bir ümid yeri qalmayan “Bakı”nı çətinlik çəkmədən məğlubiyyətə uğratmış-4:1, AZAL isə Qəbələdə eyniadlı yerli klubla görüşdən Bakıya qələbə ilə qayıtmışdır-1:0.

“İnter” də səfərdə özünü  heç də qonaq kimi aparmamışdır. “Xəzər-Lənkəran” üzərində qələbə (2:1) cədvəlin ikinci pilləsində bakılıların mövqeyini bir qədər də möhkəmləndirmişdir. Turun “dinc” nəticə (0:0) ilə başa çatan yeganə oyununda “Neftçi” və onun qonağı “Simurq” hərəyə 1 xalla kifayətlənməli olmuşlar.

Hazırda turnir cədvəlinə tək-tənha başçılıq edən “Qarabağ”ın 37, ondan bir oyun çox keçirən “İnter”in isə 33 xalı vardır. Bu iki liderin ən yaxın izləyicisi “Nefçi” (27 xal) onlardan çox geri qalır.

İyirmi birinci tura bu gün “Simurq” - “Qəbələ” görüşü ilə start veriləcək, qalan üç oyun isə sabah keçiriləcəkdir: “Bakı”- “Sumqayıt”, AZAL - “Qarabağ”, “Neftçi” - “Xəzər-Lənkəran”.

Oqtay BAYRAMOV,
“Xalq qəzeti”