Qadın komandaları arasında Çempionlar Liqası və Avropa Voleybol Konfederasiyası kuboku turnirləri həlledici mərhələyə qədəm qoymuşdur. Püşk növbəti görüşlərdə Azərbaycan klublarının rəqiblərini müəyyənləşdirmişdir.

Çempionlar Liqasının pley-off mərhələsinin birinci raundunda “Azəryol”u fevralın ikinci ongünlüyündə İtaliyanın “Yamamay” komandası ilə iki çətin oyun gözləyir. Rəqiblər əvvəlcə Bakıda, sonra da İtaliyada qarşılaşacaqlar. Cütün qalibi növbəti mərhələdə İtaliyanın “Pyaçentsa” və Rusiyanın “Dinamo” (Moskva) komandalarının görüşlərində qələbə qazanan komandaya rəqib olacaq.

“Rabitə” isə Avropa Voleybol Konfederasiyasının kuboku turnirinin dörddəbir finalında Fransanın “Bezye” klubu ilə “münasibətləri aydınlaşdıracaq”. İlk  oyun martın əvvəlində Fransada, cavab görüşü bundan bir həftə sonra Bakıda keçiriləcəkdir. Əgər ölkə çempionumuz “Bezye”nin öhdəsindən gələ bilsə, yarımfinalda “Dinamo” (Krasnodar, Rusiya) – “Nant” (Fransa) cütünün qalibi ilə  görüşəcək.