Azərbaycanın bədii gimnastika ustaları Moskvanın "Olimpiyski" İdman Kompleksində davam edən dünya çempionatında daha bir bürünc medala sahib olmuşlar. Təmsilçilərimiz dörd təmrin (halqa, ip, lent və top) üzrə çıxışların yekununda rusiyalı və belaruslu rəqiblərindən sonra komanda hesabında üçüncü yeri tutmuşlar.
Ölkəmizə ilk bürünc mükafatı isə artıq bildiyiniz kimi, Aliyə Qarayeva qazandırmışdır. O, halqa ilə hərkətləri yüksək ustalıqla yerinə yetirərək fəxri kürsünün üçüncü pilləsində təbrikləri qəbul etmiş və gimnastımızın bu müvəffəqiyyəti şərəfinə nəhəng idman sarayında qaliblərin mükafatlandırılması mərasimində Azərbaycanın milli bayrağı yüksəyə qaldırılmışdır.
Aliyə Qarayeva, Anna Qurbanova və Samirə Mustafayeva dünən lent və topla hərəkətlərin icrasında təsnifat yarışlarında çıxışlarını başa vurmuşlar. Bu təmrinlərdə medallar uğrunda mübarizəni davam etdirmək üçün onlar səkkiz finalçı sırasına daxil olmalı idilər.
Bu gün dünya çempionatında çoxnövçülükdə qalib və mükafatçılar məlum olacaq.

O.BAYRAMOV, "Xalq qəzeti"