Qadın şahmatçıların növbəti Azərbaycan çempionatının ilk  dörd turu bakılı Nərmin Kazımovanın dörd qələbəsi ilə əlamətdar olmuşdur. O, paytaxtın digər təmsilçiləri Xatın Bağırova, Xəyalə Abdulla, Pərvanə İsmayılova və şirvanlı Gülnar Məmmədovaya qalib gələrək 4 xalla turnir cədvəlində vahid lider mövqeyində qərar tutmuşdur.

İkinci pillədə irəliləyən Ülviyyə Fətəliyeva (Gəncə) üç qələbə və bir heç-heçə sayəsində 3,5 xal toplamışdır. Üç-beşinci yerləri bölüşdürən  İsmayılova, sumqayıtlı Zeynəb Məmmədyarova və Nərmin Məmmədova (Bakı) dörd turda hərəyə 3 xal qazanmışlar.

İsveçrə sistemi üzrə keçirilib doqquz  turdan ibarət olan Azərbaycan çempionatının medalları uğrunda 20 iştirakçı mübarizə aparır. Dünən beşinci turun görüşləri oynanılmış və turnir məsafəsinin birinci yarısı arxada qalmışdır.

Oqtay BAYRAMOV,
“Xalq qəzeti”