Azərbaycan şahmatçısı Teymur Rəcəbov Hollandiyada keçirilən ənənəvi beynəlxalq turnirdə nəhayət, qələbələrinin hesabını açmışdır. Qrossmeysterimiz üç heç-heçə və bir məğlubiyyətdən sonra beşinci turda xorvatiyalı İvan Sariçlə görüşdə qara fiqurlarla daha dəqiq oynayaraq rəqibini məğlubiyyətlə barışmağa məcbur etmişdir.

Bu qələbə Rəcəbova xal ehtiyatını 2,5-ə çatdırmaq və turnir cədvəlində öz  vəziyyətini bir qədər yaxşılaşdırmaq imkanı vermişdir. İlk beş görüşdə əlli faizli nəticə göstərən təmsilçimiz 3,5 xalla ikinci-üçüncü yerləri bölüşdürən Raymond Voytaşek (Polşa) və Din Lijendən (Çin) bir xal geri qalır. Vahid lider ukraynalı Vasili İvançuk isə 4 xal toplamışdır. Xatırladaq ki, turnirin mükafatları uğrunda 14 məşhur qrossmeyster mübarizə aparır.

Bu arada kişilər arasında növbəti Azərbaycan çempionatına yekun vurulmuşdur. Üç iştirakçı Rauf Məmmədov, Eltac Səfərli və Vasif Durarbəyli finişə eyni nəticə 6,5 xalla çatmışlar. Məmmədov əlavə göstəricilərə görə ölkə çempionu adını qazanmışdır. Gümüş və bürünc medallara müvafiq surətdə E.Səfərli və V.Durarbəyli sahib olmuşlar.

Oqtay BAYRAMOV,
“Xalq qəzeti”