Bakıda Birinci Avropa Oyunları (12-28 iyun) starta yaxınlaşdıqca müxtəlif ölkələr öz komandalarının tərkibini elan edirlər. Məsələn, Rusiya Oyunlarda 300-ə qədər idmançı ilə təmsil olunmağı planlaşdırır.

Bu barədə azerisport-un yaydığı xəbərdə bildirilir ki, Rusiya Milli Olimpiya Komitəsinin nümayəndəsi İqor Kazikov “Ves sport”a müsahibəsində demişdir ki, bugünə qədər Oyunların proqramına daxil olan 20 növdən 11-də 200-dən artıq rusiyalı Avropa Oyunlarına seçilib. Gözlənildiyinə görə, Bakıda 300 idmançımız çıxış edəcək. Rusiya nümayəndə heyətinin ümumi tərkibi isə 600 nəfərə qədər olacaq.

İ.Kazikov daha sonra demişdir: – Avropa Oyunları proqramına bir sıra qeyri-olimpiya növləri daxil edilmişdir. Bunlar sambo, karate, aerobika, çimərlik futbolu, basketbol (3x3), habelə bir paralimpiya idman növü – görmə qabiliyyəti zəif olanlar arasında cüdo yarışlarıdır. Bununla əlaqədar biz Rusiya Paralimpiya Komitəsi, milli və qeyri-olimpiya idman növləri komitələri ilə danışıqlar aparırıq. İstəyirik ki, Rusiya yığma  komandasının hazırlığında səyləri birləşdirə bilək. Belə ki, bu növlərdə 35 dəst medal uğrunda mübarizə aparılacaq”.

Oqtay BAYRAMOV,
“Xalq qəzeti”