Topaz Premyer Liqasının 17-ci turunda bütün görüşlər məhsuldar olmuş və rəqiblərdən heç biri meydanı top vurmadan tərk etməmişdir. Hakimlər üst-üstə dörd oyunda 14 qol qeydə almışlar ki, bu da kifayət qədər yüksək göstəricidir.

Azarkeşlərin qol intizarında olmadığı turda ən çox dəqiq zərbənin şahidi “Xəzər–Lənkəran”–“Qarabağ” görüşünün tamaşaçıları olmuşlar. Maraqlı və gərgin mübarizə şəraitində davam edən oyunda Ağdam klubu ikinci dövrənin finişi ərəfəsində 3:2 hesabı ilə mühüm qələbə qazanmışdır.

Digər üç görüşdə “İnter” “Neftçi”yə qalib gələrək (2:1) onu turnir cədvəlinin ikinci pilləsindən sıxışdırmış, “Bakı” AZAL-a uduzmuş (1:3), “Sumqayıt”la “Qəbələ” isə bir-birindən heç-heçə ilə ayrılmışlar-1:1.

Hazırda turnir cədvəlinə başçılıq edən “Qarabağ”ın 31 xalı vardır. Sonuncu çempionumuzun ən yaxın izləyicisi “İnter” 28, üçüncü pillədə olan “Neftçi” 26 xal toplamışdur.

Növbəti, 18-ci turun oyunları təqvimdə dekabrın 21-nə təyin edilmişdir. Qarşıdakı turda “Qarabağ” futbolçuları “Sumqayıt”ı sınağa çəkəcəklər, həmçinin “Xəzər-Lənkəran”–AZAL, “Qəbələ”–“İnter” və “Simurq”–“Bakı” görüşləri keçriləcəkdir.

Oqtay BAYRAMOV,
“Xalq qəzeti”