Qətərin paytaxtı Doha şəhərində keçirilən “Qatar Masters Open” beynəlxalq şahmat turniri tədricən finişə yaxınlaşır. Xəbər verdiyimiz kimi, bu yarışın 150-dən çox iştirakçısı arasında Azərbaycanın yeddi şahmatçısı da var.

Altı turdan sonra təmsilçilərimiz arasında ən yaxşı nəticəni Rauf Məmmədov göstərmişdir. O, altıncı turda polşalı qrossmeyster Dariuş Sverç üzərində qələbədən sonra xal ehtiyatını 4,5-ə çatdıraraq daha 11 rəqiblə 3-14-cü yerləri bölüşür.

Qədir Hüseynov, Vasif Durarbəyli və Eltac Səfərli hərəyə 4, Şəhriyar Məmmədyarov 3,5, Günay Məmmədzadə 3, Zeynəb Məmmədyarova 2,5 xal toplamışlar.

Finişə üç tur qalmış turnir cədvəlinə keçirdiyi bütün altı görüşdən qalib ayrılaraq 6 xal toplayan hollandiyalı Aniş Giri başçılıq edir. İkinci yerdə olan keçmiş dünya çempionu Vladimir Kramnik (Rusiya) liderdən bir xal geri qalır.

Oqtay BAYRAMOV,
“Xalq qəzeti”