Beynəlxalq Şahmat Federasiyası (FİDE) 2014-cü il dekabrın 1-nə olan vəziyyətə görə növbəti reytinq cədvəlini dərc etdirmişdir. Dünyanın yüz ən yaxşı qrossmeysteri sırasında Azərbaycanın üç şahmatçısı da var.

İkiqat dünya çempionu norveçli Maqnus Karlsenin (2862) başçılıq etdiyi siyahıda Şəhriyar Məmmədyarov (2765) 11-ci, Teymur Rəcəbov (2734) 21-ci, Rauf Məmmədov (2658) 94-cü pillədədirlər.

Bu yaxınlarda Soçidə keçmiş dünya çempionu Mixail Talın xatirəsinə həsr edilən blits üzrə mötəbər beynəlxalq turnirin qalibi olmuş Məmmədyarov sürətli şahmatın bu növündə 2866 xalla üçüncü pillədə irəliləyir. Burada ilk iki yeri Karlsen (2948) və ABŞ təmsilçisi Hikaru Nakamura (2906) tuturlar.

Oqtay BAYRAMOV,
“Xalq qəzeti”