UEFA Avropa Liqası turnirinin qrup mərhələsinin beşinci turu çərçivəsində keçiriləcək “Sent-Etyen” (Fransa)-“Qarabağ” (Azərbaycan) görüşünü islandiyalı hakim Kristin Yakobsson idarə edəcəkdir.

Noyabrın 27-nə təyin edilmiş bu oyun Bakı vaxtı ilə saat 00:05-də başlanacaq.

Hazırda hər iki rəqibin, eləcə də “Dnepr”in (Ukrayna) 4 xalı var. Qrupun lideri “İnter” (İtaliya) 8 xala malikdir. Fransızlarla matç Avroliqanın pley-off mərhələsinə aparan yolda həm Ağdam klubu, həm də “Sent-Etyen” üçün mühüm əhəmiyyət kəsb edir.

Yeri gəlmişkən, “Qarabağ” səfərə yaxşı əhval-ruhiyyə ilə yola düşmüşdür. Azərbaycan çempionu Topaz Premyer Liqasının növbəti turunda AZAL üzərində qələbədən sonra (2:1) xal ehtiyatını 24-ə çatdıraraq turnir cədvəlinin zirvəsində öz mövqeyini bir qədər də möhkəmləndirmişdir. İkinci pillədə olan “Neftçi” liderdən 3 xal geri qalır.