Sentyabrın 14-də Mərkəzi Bankda şahmat üzrə kişi və qadın yığma komandamızın üzvləri ilə görüş keçirilmişdir.
Şahmat Federasiyasının prezidenti Elman Rüstəmov son illər Azərbaycan şahmat məktəbinin dünya və Avropa miqyasında qazandığı nailiyyətlərdən söz açmış, bütün bu uğurların şahmatçılarımızın böyük potensialından və statusundan irəli gəldiyini qeyd etmişdir. O demişdir ki, olimpiadada iştirak edəcək kişilərdən ibarət komandamız çox güclüdür və ən yüksək nəticə uğrunda mübarizə aparmağa qadirdir. Qadın yığma komandamızın da perspektivləri yüksəkdir. Ümidvaram ki, komandanın üzvləri olimpiadada yaxşı nəticə göstərəcəklər. Milli komandada oynamaq, dövləti təmsil etmək hər bir idmançı üçün olduqca böyük şərəfdir.
E.Rüstəmov Azərbaycan şahmatsevərlərinin komandamızdan yalnız qələbə gözlədiyini və onların qarşısında olimpiya çempionu olmaq vəzifəsi qoyulduğunu vurğulamışdır.
Federasiyanın vitse-prezidenti Mahir Məmmədov Azərbaycan şahmatının yeni inkişaf dövrünə qədəm qoyduğunu, son illər gənc şahmatçılarımızın yetişməsi, beynəlxalq yarışlarda təcrübə toplaması istiqamətində dövlət səviyyəsində mühüm tədbirlərin görüldüyünü önə çəkmişdir. Xantı-Mansı şəhərinə yola düşəcək hər iki komanda üzvlərinin psixoloji və fiziki vəziyyətindən razı qaldığını deyən M.Məmmədov şahmatçılarımıza uğurlar diləmişdir.
Sonra mətbuat konfransı keçirilmiş, jurnalistləri maraqlandıran sualları cavablandırılmışdır.{nl}