Beynəlxalq Şahmat Federasiyasının (FİDE) “Qran-Pri” yarışları seriyasından ikinci mərhələ olan Daşkənd turnirində bir günlük istirahətdən sonra keçirilən beşinci turda hər iki azərbaycanlı qrossmeyster taxta arxasından “dinc” nəticə ilə ayrılmışdır.  Şəhriyar Məmmədyarov Bakı mərhələsinin iki qalibindən biri italiyalı Fabiano Karuana ilə, Teymur Rəcəbov isə Ukrayna təmsilçisi Dmitri Andreykinlə xalı yarı bölmüşlər.

Rüstəm Qasımcanov (Özbəkistan)-Aniş Giri (Hollandiya) görüşündə də heç-heçə qeydə alınmışdır. Digər üç oyun isə məhsuldar olmuşdur. Bu görüşlərdə Baadur Cobava (Gürcüstan) Sergey Karyakinə (Rusiya), Hikau Nakamura (ABŞ) Bakı turnirinin digər qalibi Boris Gelfanda (İsrail), Dmitri Yakovenko (Rusiya) fransız Maksim Vaşye-Laqrava qalib gəlmişlər.

On bir turdan ibarət yarışın ilk beş turunda ən yaxşı nəticəni Nakamura göstərmişdir-3,5 xal. Cədvəlin ikinci-dördüncü pillələrində irəliləyən Andreykin, Vaşye-Laqrav və Cobava liderdən yarım xal geri qalırlar. Məmmədyarov, Rəcəbov, habelə daha üç qrossmeyster Giri, Karyakin və Yakovenko beş görüşdə əllifaizli nəticə göstərərək hərəyə 2,5 xal toplamışlar. Karuanın 2, Gelfandla Qasımcanovun 1,5 xalı vardır.

Dünən keçirilən altıncı turda Məmmədyarov Qasımcanovla, Rəcəbov isə Giri ilə görüşmüşlər. Bu turla da Daşkənd turnirində yolun birinci yarısı arxada qalmışdır.

Oqtay BAYRAMOV,

“Xalq qəzeti”