UEFA Avropa Liqası turnirində qrup mərhələsinin birinci dövrəsini ikinci yerdə başa vuran Ağdamın “Qarabağ” komandası Topaz Premyer Liqasında da uğurlu çıxışlarını davam etdirir. Doqquzuncu turda “Xəzər-Lənkəran”la görüşdə 3:2 hesabı ilə qələbədən sonra Qurban Qurbanovun yetirmələri turnir cədvəlində vahid lider mövqeyinə yüksəlmişlər.

Səkkiz oyunda 17 xal toplayan “Qarabağ”  cədvəldə ən yaxın izləyicisi, hesabat  turunda “Neftçi”  ilə görüşdən qolsuz heç-heçə ilə ayrılan (0:0) “İnter”dən bir xal irəlidədir. Üstəlik də, ağdamlılar paytaxt klubundan bir oyun az keçirmişlər.

Ötən turun digər görüşlərində “Qəbələ” öz meydançasında “Sumqayıt”ı məğlubiyyətə uğratmış-3:1, AZAL “Bakı”ya uduzmuş-0:1, “Simurq” isə pərəstişkarlarını “Araz-Naxçıvan” üzərində böyük hesablı qələbə ilə sevindirmişdir-4:0.

Çempionatda onuncu turun oyunları oktyabrın 29-da keçiriləcəkdir. Bu turda “İnter”-“Qarabağ” görüşü, şübhəsiz, daha böyük maraqla gözlənilir. Rəqiblərdən hər hansı birinin qələbəsi onun turnir mövqeyini bir qədər də möhkəmləndirəcəkdir. Bu turda həmçinin “Sumqayıt”-“Xəzər-Lənkəran”, “Bakı”-“Neftçi”, “Araz-Naxçıvan”-“Qəbələ” və AZAL-“Simurq” görüşləri keçiriləcəkdir.

Oqtay BAYRAMOV,

“Xalq qəzeti”