İtaliyada qadınlardan  ibarət voleybol komandaları arasında dünya çempionatı ABŞ kollektivinin qələbəsi ilə başa çatmışdır. Amerikalılar həlledici final görüşündə Çin yığmasını 3:1 hesabı ilə məğlubiyyətə uğratmış və öz komandalarının tarixində ilk dəfə dünya çempionu olmuşlar.

Bürünc medallara Braziliya voleybolçuları sevinmişlər. Onlar üçüncü yer uğrunda oyunda gərgin mübarizədən sonra İtaliya komandasına qalib gəlmişlər-3:2.

Xatırladaq ki, 24 ölkə komandalarının mübarizə apardığı və üç həftə davam edən dünya çempionatında Azərbaycan millisi  çıxışlarını 15-ci yerdə başa vurmuşdur.

Oqtay BAYRAMOV,

“Xalq qəzeti”