Azərbaycanın qadınlardan ibarət milli komandasının voleybolçuları İtaliyada keçirilən dünya çempionatının ikinci mərhələsinə vəsiqə qazanmaq məqsədinə çox yaxındırlar.

“D” qrupunda çıxış edən komandamızın üçüncü turda Puerto-Riko kollektivi ilə gərgin oyunda 3:2 hesabı ilə çətin qələbə qazandığı günün axşamı bu qrupda keçirilmiş digər görüşdə Çin voleybolçuları Belçika komandasını, yaponlar isə kubalı rəqiblərini məğlubiyyətə uğratmışlar. Hər iki matçda 3:0 hesabı qeydə alınmışdır.

Bu turdan sonra çempionat iştirakçıları birgünlük istirahətə çıxmışlar. Qrup mərhələsinin finişinə iki tur qalmış Çin komandası yüzfaizli nəticə ilə liderdir – 9 xal. Yaponiya, Azərbaycan və Puerto-Rikonun hərəyə 4 xalı var. Onlar hissələrin fərqinə görə turnir cədvəlində ikinci-dördüncü yerləri elə bu ardıcıllıqla bölüşürlər. Beşinci pillədə olan belçikalılar 3 xal toplamışlar, kubalılar isə hər üç oyunda uduzmuşlar.

Dördüncü turun görüşlərinə bu gün start veriləcəkdir. Fasiləyə iki qələbə və yaxşı əhval-ruhiyyə ilə çıxan Azərbaycan voleybolçuları bu turda Belçika komandasına qarşı oynayacaqlar. Sabah, qrup mərhələsinin finişində isə rəqibimiz Kuba kollektivi olacaq. İkinci mərhələdə mübarizəni davam etdirmək vəzifəsini yerinə yetirmək üçün yığmamıza bu iki görüşdən birində qələbə yəqin ki, kifayət edəcək.

Xatırladaq ki, hərəsinə altı komandanın daxil olduğu dörd qrupun hər birində ilk dörd yeri tutan kollektivlər ikinci mərhələdə yollarına davam edəcəklər. Bu mərhələnin oyunları oktyabrın 1-dən 5-dək keçiriləcəkdir.

Oqtay BAYRAMOV, “Xalq qəzeti”