Qadınlardan ibarət milli voleybol komandamız İtaliyada keçirilən dünya çempionatının elə birinci turunda bir qədər gözlənilməz və çox mühüm qələbəyə nail olmuşdur. Həmvətənlərimiz gərgin oyunda güclü Yaponiya yığmasına qalib gəlmişlər- 3:2.

Maraqlı mübarizə şəraitində davam edən görüşdə dörd hissədən sonra hesab bərabər olmuş, həlledici beşinci hissədə isə Azərbaycan voleybolçuları öz üstünlüklərini inamla sübuta yetirmişlər- 15:9. Bu oyunda Polina Rəhimova xüsusilə fərqlənərək komandasına 33 xal qazandırmışdır.

Çempionatın start turunda Azərbaycan və Yaponiya kollektivlərinin çıxış etdikləri “D” qrupunda keçirilmiş digər iki görüşdə Çin voleybolçuları Puerto-Riko komandasını, belçikalılar isə kubalıları məğlubiyyətə uğratmışlar. Hər iki oyun 3:0 hesabı ilə başa çatmışdır.

İndiki çempionat əvvəllər iki dəfə ( 1994 və 2006 - cı illərdə ) planetin ən böyük voleybol bayramının iştirakçısı olmuş Azərbaycan komandası üçün sayca üçüncüdür. Voleybolçularımız qrup mərhələsinin oyunlarını Bari şəhərində keçirirlər.

Dünya çempionatının medalları uğrunda 24 ölkənin komandaları mübarizə aparırlar. İlkin mərhələdə rəqiblər hərəsində altı kollektiv olmaqla dörd qrupa bölünmüşlər. Qruplarda ilk dörd yeri tutan komandalar ikinci mərhələdə oynamaq hüququ qazanacaqlar.

İlkin mərhələ yarışlarına sentyabrın 28 - də yekun vurulacaqdır. Azərbaycan voleybolçuları ikinci görüşü dünən Çin komandasına qarşı keçirmiş və uduzmuşlar – 0:3.

Oqtay BAYRAMOV, “Xalq qəzeti”