Ölkəmiz bu parlaq qələbənin sevincini Özbəkistan paytaxtında dünya çempionatının sonuncu günü yaşadı. Azərbaycanın yunan-Roma güləşi üzrə milli komandasının üzvü Rəsul Çunayev 71 kq çəki dərəcəsində üçüncü yer uğrunda görüşdə erməni Varşam Boranyana aman verməyib cəmi 23 saniyə ərzində onu tam üstünlüklə məğlubiyyətə uğradaraq (11:0) özünün mükafatlar kolleksiyasını dünya çempionatının bürünc medalı ilə bir qədər də zənginləşdirdi.

Azərbaycan əsgəri kimi rəqibə qalib gəlməyi özünə borc bilib prinsipial görüşdən möhtəşəm qələbə ilə ayrılan Rəsulun bu uğuru “klassiklərimizin” Daşkənd xalçası üzərində üçüncü müvəffəqiyyəti idi. Ondan əvvəl Çunayevin komanda yoldaşları Saman Təhmasibi (85 kq) gümüş, Elvin Mürsəliyev (75 kq) bürünc medal qazanmışdılar.

Ümumilikdə Azərbyacan idmançıları dünya çempionatında yeddi dəfə fəxri kürsüdə təbrikləri qəbul etmişlər. Xatırladaq ki, sərbəst üsulla güləşənlərin yarışında Hacı Əliyev (61 kq) qızıl, Xetaq Qazyumov (97 kq) gümüş mükafatlara sahib olmuşlar, qadınların turnirində Yuliya Ratkeviç (60 kq) gümüş, Mariya Stadnik (48 kq) bürünc medal qazanmışlar.

Oqtay BAYRAMOV,

“Xalq qəzeti”