Sentyabrın 6-da Gənclər və İdman Nazirliyində mətbuat konfransı keçirilmişdir.
Nazir Azad Rəhimov bildirmişdir ki, mətbuat konfransı Sinqapurda keçirilmiş yeniyetmələrin birinci Yay Olimpiya Oyunlarının nəticələri ilə əlaqədar keçirilir. Azərbaycan yığması 205 ölkənin iştirak etdiyi yarışda uğurla çıxış edərək 11-ci pillədə qərarlaşmışdır. Azərbaycan İslam ölkələri arasında birinci, MDB ölkələri arasında üçüncü, Avropa ölkələri arasında isə altıncı olmuşdur. Ümumilikdə, Olimpiya Oyunlarında 98 ölkə medal qazanmışdır. Qazanılmış bu uğuru və nailiyyəti Azərbaycan Prezidenti İlham Əliyev yüksək qiymətləndirmiş, idmançılar və onların məşqçilərini qəbul etmişdir.
Nazir vurğulamışdır ki, cari ilin son 9 ayı ərzində Azərbaycan idmançıları olimpiya və qeyri-olimpiya idman növlərində 300-dən çox medal qazanmışlar. Ölkəmizdə 36 beynəlxalq yarış keçirilmiş və ilin sonunadək daha 10 turnir keçiriləcəkdir. Azərbaycan idmançıları isə xarici ölkələrdə təşkil olunmuş 250-dən çox beynəlxalq yarışda iştirak etmişlər.
Hazırda Azərbaycanda 27 olimpiya idman kompleksi fəaliyyət göstərir, 9-u tikilir, 3-nün (Şirvan, Göygöl, Xaçmaz) isə təməlqoyma mərasimi keçiriləcəkdir. Sentyabın sonunda "Kür" Olimpiya Bazasının açılış mərasimi olacaqdır.
Sentyabrda ilk dəfə olaraq Avropa ölkələrinin idman nazirləri Azərbaycanda toplanacaqdır. Keçiriləcək konfransda Avropa ölkələrində idmançıların viza məsələsi, təcrübə mübadiləsini təmin etmək və ümumi Avropa idman əməkdaşlığı məsələləri müzakirə ediləcəkdır. 150 nümayəndənin iştirak edəcəyi konfransa 50 ölkə qatılacaqdır.
Eyni zamanda, İordaniya, Küveyt, Misir ilə əməkdaşlıq sazişləri imzalanmışdır. Mübadilə proqramları çərçivəsində Koreya, Rusiya, İordaniya və Küveyt gəncləri ölkəmizə, azərbaycanlı gənclər isə bu ölkələrə səfər etmişlər. Gələn il isə Tunis, Liviya, Rusiya və Mərakeşlə sazişlərin imzalanması nəzərdə tutulur. Gənclər sahəsində 40-dan artıq tədbir keçirilmiş və bu tədbirlərdə 60 mindən artıq gənc iştirak etmişdir. 9 ayda Azərbaycanın 100-dən çox gənci xarici ölkələrdə təşkil olunmuş tədbirlərdə iştirak etmiş, 12 qeyri-hökumət gənclər təşkilatı qeydiyyatdan keçmişdir. "Cəsurlar" və "Şahin" hərbi idman oyunları, "Xəmsə" intellektual oyunu təşkil edilmişdir.
AzərTAc{nl}