Avqustun 28-də UEFA Avropa Liqası turnirinin pley-off mərhələsinin cavab görüşləri çərçivəsində Azərbaycan klublarının iştirakı ilə keçiriləcək oyunların hakimləri məlumdur.

Hollandiyanın Enshed şəhərində yerli “Tvente” ilə “Qarabağ”ın görüşünü İtaliya Futbol Federasiyasının nümayəndəsi Paolo Silvio Matsolini idarə edəcəkdir. UEFA “Neftçi” - “Partizan” (Belqrad, Serbiya) matçının hakimliyini isə avstriyalı Robert Şörgenhoferə həvalə etmişdir.

Bu arada milli çempionatımızda üçüncü turun oyunları olmuşdur. “Qarabağ” və “Neftçi”nin Avroliqa matçlarına hazırlaşmaları ilə əlaqədar olaraq onların müvafiq surətdə “Araz - Naxçıvan” və AZAL komandaları ilə görüşləri başqa vaxta keçirilmişdir. Bu turun qalan üç oyunu isə belə nəticələnmişdir: “Bakı” - “Qəbələ” - 0:2, “İnter” - “Sumqayıt” - 5:1, “Simurq” - “Xəzər - Lənkəran” - 2:0.

Üç turdan sonra turnir cədvəlində lider 7 xala malik “İnter”dir. Sonrakı üç pillədə irəliləyən “Simurq”, “Sumqayıt” və “Qəbələ”nin 6 xalı vardır. Lakin Zaqatala klubu bir oyun az keçirmişdir.

Oqtay BAYRAMOV,

“Xalq qəzeti”