UEFA Avropa Liqası turnirinin pley-off mərhələsində Azərbaycan klublarının ilk oyunlarına bir həftədən də az vaxt qalır. Təmsilçilərimiz “Qarabağ” və “Neftçi” qrup mərhələsinin astanasında özlərinə də, pərəstişkarlarına da yaxşı tanış olan rəqiblərlə görüşəcəklər.

Avqustun 21-nə təyin edilmiş birinci raund matçlarında komandalarımızdan birinci olaraq meydana Ağdam klubu çıxacaq. Azərbaycan çempionunun “Tvente” (Hollandiya) ilə görüşü Tofiq Bəhramov adına Respublika Stadionunda keçiriləcək və saat 21-də başlanacaq. Artıq oyunu almaniyalı Manuel Qrafenin idarə edəcəyi də məlumdur.

Bu görüş başa çatdıqdan yarım saat sonra isə ölkə kubokunun sahibləri-bakılılar Belqradda Serbiyanın “Partizan” komandası ilə “münasibətləri aydınlaşdırmağa” başlayacaqlar. “Partizan” stadionunda topa ilk zərbə bizim vaxtla saat 23:15-də endiriləcəkdir. Cavab görüşlərinin avqustun 28-də keçiriləcəyini də xatırladaq.

Oqtay BAYRAMOV, “Xalq qəzeti”