Slovakiyanın Snina şəhərində yeniyetmələr arasında güləş üzrə dünya birinciliyinə sərbəst üsulla güləşənlərin turniri ilə yekun vurulmuşdur. Azərbaycan təmsilçilərindən dörd nəfəri fəxri kürsüdə təbrikləri qəbul etmişdir.

Teymur Məmmədov (63 kq) və Şamil Sadullayev (85 kq) bütün rəqiblərindən daha yaxşı hazırlıq nümayiş etdirərək dünya birinciliyinin qızıl medallarının sevincini yaşamışlar.

 Əfqan Xaşalov (50 kq) və Mahir Əmiraslanov da (58 kq) finaladək bütün rəqiblərindən güclü olmuşlar. Onlar yalnız həlledici görüşdə uduzub çıxışlarını gümüş mükafatla başa vurmuşlar. Nəticədə “sərbəstlər” Azərbaycana 2 qızıl və 2 gümüş medal qazandırmışlar.

 Dünya birinciliyinin əvvəlki günlərində isə yunan-Roma üsulu ilə güləşənlər və qızlar xalça üzərinə dəvət olunmuşdular. Həmyerlilərimiz bu yarışlarda da uğurla çıxış etmişlər. “Klassiklərdən” Nicat Abdullayev (76 kq), Soslan Fanziyev (85 kq) və Cavid Feyziyev (100 kq) gümüş medallara sahib olmuşlar. Seymur Hüseynovla (46 kq) İslambek Dadov (69 kq) üçüncü yeri tutmuşlar. Qızların turnirində isə Leyla Qurbanova (49 kq) gümüş, Türkan Nəsirova (46 kq) bürünc mükafatçılar olmuşlar.

 Azərbaycan idmançılarının Slovakiyada dünya birinciliyində güləşin üç növündə üst-üstə 11 medal qazandıqlarını da qeyd edək.

Oqtay BAYRAMOV,

“Xalq qəzeti”